Tidyanin yesseḥzanen ay d-yellan seg melmi kan ed uhetwir n leḥzen ay inekren deffir-nsent d ayen ay aɣ-yeǧǧan ad d-nessers assefhem-a: 

1- Tlaxcala ur telli d igen (armée), wala d akabar, wala d tagrawt n ddin ay yettzuxxun tessen tidet. 

2- Nekkni d tagrawt kan n yimdanen yeddukklen s lebɣi-nsen akken ad ttekkin deg usseḍher n tafat ed ufham n tedyanin ay la iḍerrun deg umaḍal ed ussuɣel n teftarin (documents) ay nettwali uklalent ad d-ttwassuɣlent. 

3- Assuffeɣ ed ussuɣel n kra n teftart (document) ur yebɣi ad d-yini dakken nwufeq ayen ay d-yeddan deg-s s 100%. 

4- Nettwali dakken imeɣriyen (wid yeqqaren) zemren ad sɛun leṛyuy-nsen i yiman-nsen deg wayen yerzan isalan d teslaḍ (analyses) ay d-nettakf. 

5- Llan gar-aneɣ medden seg wakk leṣnaf, sɛan imecwaṛen yemgerraden yerna yemgerrad wayen ayyes ttamnen. D acu kan, nemsefham ɣef lmufid: ayen ay d-yenna George W. Bush deg Ctembeṛ n 2001 ed "umgaru ɣef tremmiɣt" (guerre contre le terrorisme) ay d-yesseɣret François Hollande deg Nwembeṛ n 2015 ur ḥebbsen ara taremmiɣt; imgura-a n tririt n ttaṛ ttgen kan ifadden i ṣṣenf-a n tekriḍt (violence) d ufraq-nnes. Aya yenfeɛ kan tamguri (industrie) n leslaḥ. Amur ameqran seg teɣtas (victimes) n tremmiɣt seg yimezdaɣen n tmura n unẓul, yerna amur ameqran seg-sen d Inselmen. Ala 3% seg teɣtas n tremmiɣt seg 2001 ar ass-a ay yellan seg tmura tutrimin (occidentales). 

6- Ass-a, taremmiɣt tesɛa snat n tliwa ayseg d-tettagem: tamezwarut taremmiɣt d "tanekra ibanen ad d-tili", tekka-d seg wurfan n yimdanen ay yettwaḍelmen; seg yidis niḍen, taremmiɣt la tt-sseqdacent tegrawin yellan deg udabu, yerna imezwura d imeẓla (services) uffiren ay la yettgen ayen ayyes ten-ttamṛen. 

7- Taɣtest (victime) tamezwarut deg yal amgaru nettat d tidet. Ccɣel-nneɣ netta d attekki, akken nezmer, deg ussukkes n tidet, yerna njebbed-d lwelha, i lmend n waya, ɣer tedyanin ay la iḍerrun, ṣṣwab n medden ay la yesseqdacen Internet d tezmert-nsen akken ad xemmemen.

8- Tlaxcala d aẓeḍḍa yeldin i wakk medden yesɛan lebɣi zeddigen yerna ssnen tutlayin, sɛan akud yerna wejden ad ttekkin deg tiddit-a-nneɣ tucrikt war ma ḍemɛen kra n lfayda n tedrimt.

Taseqqamut n Uẓrag n Tlaxcala