TLAXCALA تلاكسكالا Τλαξκάλα Тлакскала la red internacional de traductores por la diversidad lingüística le réseau international des traducteurs pour la diversité linguistique the international network of translators for linguistic diversity الشبكة العالمية للمترجمين من اجل التنويع اللغوي das internationale Übersetzernetzwerk für sprachliche Vielfalt a rede internacional de tradutores pela diversidade linguística la rete internazionale di traduttori per la diversità linguistica la xarxa internacional dels traductors per a la diversitat lingüística översättarnas internationella nätverk för språklig mångfald شبکه بین المللی مترجمین خواهان حفظ تنوع گویش το διεθνής δίκτυο των μεταφραστών για τη γλωσσική ποικιλία международная сеть переводчиков языкового разнообразия Aẓeḍḍa n yemsuqqlen i lmend n uṭṭuqqet n yilsawen dilsel çeşitlilik için uluslararası çevirmen ağı

 19/01/2020 Tlaxcala, the international network of translators for linguistic diversity Tlaxcala's Manifesto  
English  
 LAND OF PALESTINE 
LAND OF PALESTINE / Taluft n Falesṭin, Aɛṛaben ed Isṛayil: Taskint n Matzpen, 18 Mayyu, 1967
Date of publication at Tlaxcala: 01/07/2012
Original: Matzpen Manifesto - 1967
Translations available: Español  Türkçe  Français  Italiano  Deutsch  عربي 

Taluft n Falesṭin, Aɛṛaben ed Isṛayil: Taskint n Matzpen, 18 Mayyu, 1967

Matzpen מצפן متسبين

Translated by  Omar Mouffok عمر موفق

 

Xemsa ed ṛebɛin n yiseggasen aya seg wasmi ay d-teffeɣ teskint-a (manifeste) ara teɣrem swadda-a. Taskint-a d tin ay d-tessuffeɣ deg weɣmis-nnes Tuddsa Tanemlayt (organisation socialiste) Tisṛayilit ay yettwassnen s yisem n Matzpen (tabuṣult). Aṭas n tɣawsiwin ay ibeddlen seg wass-nni s ass-a. Awal ay yettwasqedcen deg teskint-a ad aɣ-d-iban, ass-a, iɛedda-t zzman, d acu kan, tikta-nnes mazal-itent ddrent ar ass-a”-Tlaxcala, Mayyu 2012

 
Taskint-a (manifeste) ay yettwarun deg Mayyu n 1967, d nettat ay d lkaɣeḍ amezwaru ay d-tessuffeɣ Tuddsa Tanemlayt (organisation socialiste) n Iṣrayil i lɣaci deg wayen yerzan taluft n Wegmuḍ (ccerq) Alemmas. Taskint-a ɣran-tt-id deg yiwet n temlilit ay iledyen i wegdud, d tin ay d-yellan deg Paris deg wass n 18 Mayyu 1967, d timlilit ay d-yellan s uɛawen n tuddsiwin n yinelmaden aɛṛaben ed yifalesṭiniyen. Timlilit-a yebder-itt-id weɣmis n Le Monde deg wass n 20 Mayyu 1967. Yessefk kan ad d-nesmekti timuɣliwin ay d-yeddan deg teskint-a llant yagi uqbel ma tebda-d taluft-nni n 1967. (Taskint-a teffeɣ-d i tikkelt tamezwarut deg World Outlook).  
 
Ayyur-a ara yettwasfugel umulli wis 19 seg wasmi ay d-ilul uwanak (ddula) n Isṛayil. Maca ɣas kkan 19 n yiseggasen seg wasmi ay d-tennulfa Isṛayil, taluft ay tt-icerken ed Waɛṛaben mazal-itt tebɛed aṭas akken ad tefru. Taluft n Falesṭin mazal-itt d adeddi ay iledyen deg tfekka n Wegmuḍ (ccerq) Alemmas: mazal-itt d taluft ay yessazzalen idammen war aḥbas, d taluft ay d-igellun s lqerḥ ed weḍlam; d taluft ay icewwlen mliḥ tadamsa deg tama-a; yerna d taluft ayyes d-ttafent tmura timnukdanin (impéralistes) tasebba akken ad d-grent iman-nsent deg tama-a s yiserdasen-nsent; d taluft ay izemren ad teswaɣ talwit deg umaḍal akken ma yella.
 
Ayen iweɛṛen ugar netta d tagnit aydeg llan Waɛṛaben n Falesṭin – wid ay yenḍerren srid seg wemgaru [ṭṭrad] n 1948, asmi ay msefhamen fell-asen “yeɛdawen iḥbiben”, Ben-Gurion ed ugellid Ɛebdellah [n Luṛdun]. Amur ameqran seg Waɛṛaben n Falesṭin ttwakksen-asen yexxamen-nsen ed yigran-nsen ama deg wemgaru-nni, ama deffir wemgaru-nni, yerna seg wass-nni s ass-a, atni la tteddren d izruzaɣ (réfugiés) yenḍerren, beṛṛa i Isṛayil. Imḍebbren n Isṛayil ugin akk ad steɛṛfen s wezrf n yemdanen-a akken ad d-qqlen ɣer tmurt-nsen. Ma d Aɛṛaben ay d-yeqqimen deg Isṛayil, atni deg tegnit taweɛṛant seg yidis n tdamsa, yerna ddren ddaw tḥeqranit d tameqrant ddaw uwanak isṛayili.
 
Deg 19-a n yiseggasen ay yezrin, Isṛayil tedder am tegzirt ay yettwaɛezlen deg Wegmuḍ (ccerq) Alemmas. Nnig waya, Isṛayil tesɛa kan azarug-nnes (indépendance) s yisem, wanag, deg tidet, ur tezmir ad tedder war lemɛawna tudmist ed lemɛawna tasertit n tmura timnukdanin (impérialistes), ladɣa lemɛawna n Yiwunak Yeddukklen. Isṛayil tella dima d ttawil ay sseqdacent tmura-a mgal tmura taɛṛabin ed yiɣallen ay yebɣan ad ddun ɣer sdat deg tmura-a. Aya yettban-d mliḥ deg dduṛ turar Isṛayil deg 1956 i lmend n ccwal (yerna ur d tin ay d tikkelt tawḥidt aydeg tettekka Isṛayil deg ccwal). Imir-nni, Isṛayil tedda ed Yebriṭaniyen akked Yefṛensisen akken ad tɛeddin ɣef Maṣer, yerna tefka-asent ula d tasebba i tmura-a akken ad mmɣent ɣef Yimaṣriyen.  
 
Seg wasmi ay d-tennulfa Isṛayil, 19 n yiseggasen aya, nettat tettedder deg tegnit n wemgaru (ṭṭrad) ed tmura taɛṛabin ay d-yezzin fell-as. Nnig waya, imḍebbren iṣehyuniyen n Isṛayil ur yelli deg nneyya-sen ad beddlen tikli-a. Tasertit tisṛayilit d abrid ur yessuffuɣen.
 
Ass-a, Isṛayil tedder deg yiwet n taluft d tameqrant n tdamsa, d tin ay yejjan aṭas n yixeddamen war axeddim, yerna tessenḍerr aṭas n medden. Aya yesskanay-d daɣen amek Isṛayil ur tezmir ad tkemmel ad tedder akken tella ass-a, d awanak (ddula) aṣehyuni ay igezmen iman-nnes ɣef tmura ay d-yezzin fell-as.  
 
Tagnit-a daɣen d tin ay iḍurren ula d iɣerfan aɛṛaben: Isṛayil, akken tella ass-a, teqqel d ugur ur yejjin iɣerfan n tmura-a ad nnaɣen mgal temnukda (impérialisme) yerna ad ddukklen gar-asen. Maca ma tkemmel tegnit-a, ula d Isṛayiliyen ad nḍerren.
 
Tuddsa Tanelmayt (organisation socialiste) Tisṛayilit d tarbaɛt aydeg ttekkan ama d Aɛṛaben, ama d Udayen. Tarbaɛt-a tettwali taluft n Falesṭin ed tin yellan gar Isṛayil ed tmura taɛṛabin yessefk ad frunt s tnemla (socialisme), yerna s ferru n wakk udmawen n temsalt-a taweɛṛant. Taluft-a ur telli d taluft kan n menwala gar snat kan n tmura. Nnig waya, nettwali ɣas ma yella yal aɣref ad yesteɛṛef s yizerfan n weɣref niḍen aya ur d-yettkafi akken ad tt-yefru.
 
Awanak (ddula) n Isṛayil ilul-d seg ussehres (colonisation) n Falesṭin. D amussu aṣehyuni ay ikecmen tamurt n Yifalesṭiniyen, yekkes-asen akal-nsen ddaw leɛnaya n temnukda (impérialisme). Isṛayil, akken tella ass-a, d awanak aṣehyuni, mazal la tettwasseqdac d ttawil i lmend n lebni n wayen umi semman “Lmejhud Aṣehyuni“. Timura taɛṛabin ur zmirent ad qeblent ad yili deg tlemmast-nsent uwanak aṣehyuni, d awanak ur yebɣin ad yili ɣef leḥsab n wakken ay llan yimezdaɣen-nnes, wanag yebɣa ad yili d tiqenṭert i wakk Udayen n umaḍal akken ad d-asen ad zedɣen deg Wegmuḍ (ccerq) Alemmas. Udem aṣehyuni n Isṛayil yella-d, deg tidet, mgal nnfeɛ n Yisṛayiliyen s timmad-nsen, imi skud Isṛayil mazal-itt d taṣehyunit, skud mazal ad tettkel ɣef lemɛawna n yiɣallen ibeṛṛaniyen.
 
Ɣef waya, nettwali tifrat n taluft-a nettat d tukksa n tṣehyunit seg Isṛayil. Yessefk ad d-yili ubeddel d alqayan deg uwanak (ddula) isṛayili. Yessefk ɣef Isṛayil ad tejj taṣehyunit (ur tettili d tamurt i Wudayen n umaḍal akken ma llan), yerna ad teqqel d tamurt tanemlayt (socialiste) ara iqedcen i lmend n wakk imezdaɣen ay tt-izedɣen. Lqanun n Tuqqla -win ay yefkan azref i yal Uday deg umaḍal ad d-yinig ɣer Isṛayil yerna ad yesɛu taɣlent (nationalité) n tmurt-a – yessefk ad yettwakkes. A win yufan, yal win ara d-yessutren ad d-yinig ɣer Isṛayil, yessefk ad ɣren assuter-nnes akken ad ẓren ma yella yuklal ad d-yinig ɣer tmurt-a neɣ uhu, yerna aya yessefk ad yili war meḥyaf gar ddyanat ed lejnas.
 
Ugur n yezruzaɣ (réfugiés) ifalesṭiniyen d netta ay d aḥric aweɛṛan akk deg taluft yezran Falesṭin. Ɣef waya ara d-nini yal azrazaɣ afalesṭini ay yebɣan ad yeqqel ɣer Isṛayil, yessefk ad as-yettunefk ttesriḥ ad yeg aya, yerna mi ara d-yeqqel ɣer wakal-nnes, yessefk ad as-d-qqlen yizerfan-nnes seg yidis n tdamsa ed tmetti. Ma d izruzaɣ-nni ara ifernen ur d-tteqqalen ɣer tmurt-nsen, yessefk ad asen-yettwaɣrem akk wayen ay sṛuḥen deg tmurt-nsen ed lmaḍerra ay nḍerren seg wanect-a.
 
Seg tama niḍen, akk leqwanin ay igan meḥyaf mgal Waɛṛaben n Isṛayil ed wakk leqwanin ay asen-yekksen akal-nsen yessefk ad ttwabeṭlen. Nnig waya, akk wid umi yettwakkes kra (akal, ayla, leṛwaḥ) s yisem n leqwanin-a yessefk ad asen-yettwaɣrem wayen ay asen-yettwakksen.  
 
Tukksa n tṣehyunit seg Isṛayil d tin ara ibeddlen daɣen tasertit tagraɣlant n Isṛayil, d tasertit ay iqeddcen i lmend n temnukda (impérialisme). Yuɣ lḥal, yessefk ɣef Isṛayil ad tettekki deg yimenɣi n tmura taɛṛabin mgal temnukda, am wakken ara tettekki deg ussebded n tdukli ara ijemɛen timura-a.
 
Assehres (colonisation) aṣehyuni deg Falesṭin d win ay yemgerraden mliḥ ɣef ussehres n tmura niḍen: deg tmura niḍen, wid yessehrasen (coloniser) ssebdaden-d tadamsa aydeg ssexdamen ixeddamen n tmurt-nni ay shersen, maca deg Falesṭin, iṣehyuniyen shersen tamurt, ẓẓɛen imezdaɣen-nnes ineṣliyen, yerna uwyen-d ixeddamen seg tmura niḍen.
 
Aya yerna yessewɛeṛ ugar ferru n taluft n Falesṭin. Assehres (colonisation) aṣehyuni yurew-d aɣlan (nation) n Wudayen s ṣṣifat-nnes tiɣelnawin (ass-a, Udayen n Isṛayil/Falesṭin qqlen d ljens ay yesɛan iles ucrik, tadamsa-nnes, atg.). Aɣlan-a amaynu n Wudayen ay d-yennulfan deg Falesṭin d win ay yettwabnan ɣef temsihrit (capitalisme) – d win ay yebḍan ɣef yemḍebbren [udayen] ed yixeddamen [udayen], iburjwaziyen ed yemɣiden [prolétaires].
 
Iṣehyuniyen snulfan-d aɣlan (nation) seg wulac, s tukksa n yimezdaɣen ineṣliyen ed ussebded n weɣref amaynu, d acu kan, ass-a, tillin n weɣlan uday ur yezmir ad yettwankeṛ. Win ara yeqqnen tiṭṭawin-nnes ɣef waya, ad yeg tuccḍa d tameqrant. 
 
I wakken ad tefru taluft n Falesṭin, yessefk ad yekkes lbaṭel-nni ay yekkan ɣef Waɛṛaben n Falesṭin, maca yessefk daɣen ad yettwaḍmen uzekka n Wudayen n tmurt-a. Udayen-a, d taṣehyunit ay ten-id-yuwyen ɣer Falesṭin – maca ur d nitni ay iḥekmen deg yixeṣṣaren ay tga tṣehyunit. Aɛaqeb n yixeddamen ed yemdanen isṛayiliyen n menwala ɣef yixeṣṣaren ay tga tṣehyunit ur iferru acemma deg taluft n Falesṭin, wanag ad d-yeglu kan s yixeṣṣaren imeqranen ugar.
 
Kra n yemḍebbren aɛṛaben iɣelnaẓriyen (nationalistes) gren-d tiɣri i lejhad i lmend n ussuffeɣ n Wudayen seg Falesṭin, maca nitni ur ẓrin ɣas ma tettwarna Isṛayil yerna yeɣli uwanak (ddula) isṛayili, aɣref uday n Isṛayil mazal ad yili. Ma yella ur yefri wugur n weɣlan-a (nation) s webrid n lḥeqq, tezmer ad d-tennulfu taluft d taweɛṛant yerna d taɣezfant, d tin ara yessizzlen aṭas n yidammen, ad d-teglu s waṭas n lqerḥ yerna ad tili d tasebba niḍen akken ad d-grent tmura timnukdanin (impéralistes) iman-nsent deg Wegmuḍ (ccerq) Alemmas. Yagi, imḍebbren ay d-yegren tiɣri i “tifrat“ am ta ur ssawḍen ad frun ula d taluft n Yikurdiyen.
 
Seg tama niḍen, yessefk ad nefhem yiwet n tɣawsa: aɣref isṛayili ur yezmir ad yeɣḍel azaglu n tṣehyunit arma iwala Aɛṛaben wejden akken ad ddren yid-s war ma ḍelmen-t. Ɣef waya, Tuddsa Tanemlayt (organisation socialiste) Tisṛayilit tettwali i wakken ad tefru taluft n Falesṭin, yessefk daɣen ad yettunefk wezref i weɣlan (nation) uday akken ad d-yini ṛṛay-nnes ɣef wamek ay yebɣa ad yili uzekka-nnes.
 
Ma yella yettunefk-asen wezref i Wudayen ad fernen azekka-nsen, aya ur yebɣi ad d-yini d ccerḍ ad fernen beḍḍu n tmurt. Yuɣ lḥal, Isṛayil d tamurt tamecṭuḥt yerna akal-nnes d igellil, dɣa ur tezmir ad tedder i yiman-nnes kan. Ɣef waya, Isṛayil tesɛa kann snat n tefratin: ya ad tkemmel tudert-nnes s wettkal ɣef uɛawen abeṛṛani, neɣ ad teqqel d aḥric seg tdukli ara d-yilin gar tmura n tama-a.
 
Maca iban, tifrat tawḥidt ara yeffɣen ama ɣef Waɛṛaben, ama ɣef Yisṛayiliyen, nettat d anekcum n Isṛayil deg yiwet n tdukli d tudmist (économique) yerna d tasertit akked tmura niḍen n Wegmuḍ (ccerq) Alemmas, d tadukli ara yebnun ɣef tnemla (socialisme). Deg twennaḍt am ta, aɣlan (nation) uday yezmer ad ikemmel tudert-nnes taɣelnawt, tadelsant war ma yella d amihi (danger) i Waɛṛaben yerna war ma llan-as Waɛṛaben d amihi. Iɣallen n weɣref isṛayili ad ddukklen ed wid n Waɛṛaben akken ad kemmlen imenɣi i lmend n tiddit ɣer sdat, i lmend n rrbeḥ ed lehna.
 
Ihi, nettwali tifrat n taluft tafalesṭinit – am tin n waṭas n tlufa niḍen n Wegmuḍ (ccerq) Alemmas – tezmer kann ad tefru s tdukli ara d-yilin gar tmura n tama-a. Tiẓri (théorie) ed wenrar sseknen-d tadukli gar tmura taɛṛabin ur tezmir ad d-tili ala ma tettwabna ɣef tnemla (socialisme).
 
Awal-nneɣ nezmer ad t-id-njemmel s waya: yessefk ad tettwakkes tṣehyunit seg Isṛayil, yerna yessefk ɣef tmurt-a ad tekcel deg tdukli tanemlayt (socialiste) ara yesdukklen timura n Wegmuḍ (ccerq) Alemmas. Nettwali ugur n uzekka n Waɛṛaben n Falesṭin yessefk kan ad yettwafru s tifrat-a.
 
Llan medden ay yettwalin, i wakken ad tefru taluft n Falesṭin, yessefk ad tili tmurt tafalesṭinit i yiman-nnes. Nekkni nettwali tamsalt-a yessefk d Aɛṛaben n Falesṭin ifernen ma yella ad teffeɣ fell-asen neɣ ala, yerna ur yessefk ad d-gren yibeṛṛaniyen iman-nsen deg-s. D acu kan, nettwali d tuccḍa tameqrant lemmer ad d-tili tmurt tafalesṭinit i yiman-nnes, war ma tekcem deg tdukli tanemlayt (socialiste) ara yesdukklen timura taɛṛabin niḍen. Ass-a, Aɛṛaben n Falesṭin d nitni ay yezwaren i ṣṣef deg yimenɣi i lmend n tdukli. Lemmer ad wten akken ad awyen kra i yiman-nsen kan, leqdec i lmend n tdukli yezmer ad yenḍerr mliḥ. Nnig waya, talalit n uwanak (ddula) aɛṛab afalesṭini amecṭuḥ ara yeddren i yiman-nnes kan d ayen ara iḍurren ama d nnfeɛ n Yifalesṭiniyen, ama d timura taɛṛabin niḍen. 
 
S waya, nettwali, ma yella bɣan Waɛṛaben n Falesṭin ad d-sbedden tamurt i yiman-nsen, a win yufan ad rren deg lbal-nsen tamurt-nsen ad tili d aḥric seg tdukli tanemlayt (socialiste) ara yesdukklen akk Agmuḍ (ccerq) Alemmas. Timura akk ay yeḍḍfen iḥricen seg wakal n Falesṭin – Isṛayil, Luṛdun ed Maṣer – yessefk, fell-asent akk ad ttekkint akken ad srebḥent tifrat-a.
 
Nger-d tiɣri i yiɣallen inemlayen (socialistes) igrawalen (révolutionnaires) deg tmura taɛṛabin ed tmura niḍen akken ad meyyzen tamuɣli-a ay d-nefka da yerna ad bdun awal akken ad sdukklen addud-nsen deg wayen yerzan ferru n tlufa n Wegmuḍ (ccerq) Alemmas.
 





Courtesy of Matzpen
Source: http://www.matzpen.org/index.asp?p=doc1&u
Publication date of original article: 01/01/2000
URL of this page : http://www.tlaxcala-int.org/article.asp?reference=7453

 

Tags: FalesṭinIsṛayilTaṣehyunitMatzpen-Tuddsa Tanemlayt n Iṣrayil Tanemla
 

 
Print this page
Print this page
Send this page
Send this page


 All Tlaxcala pages are protected under Copyleft.