TLAXCALA تلاكسكالا Τλαξκάλα Тлакскала la red internacional de traductores por la diversidad lingüística le réseau international des traducteurs pour la diversité linguistique the international network of translators for linguistic diversity الشبكة العالمية للمترجمين من اجل التنويع اللغوي das internationale Übersetzernetzwerk für sprachliche Vielfalt a rede internacional de tradutores pela diversidade linguística la rete internazionale di traduttori per la diversità linguistica la xarxa internacional dels traductors per a la diversitat lingüística översättarnas internationella nätverk för språklig mångfald شبکه بین المللی مترجمین خواهان حفظ تنوع گویش το διεθνής δίκτυο των μεταφραστών για τη γλωσσική ποικιλία международная сеть переводчиков языкового разнообразия Aẓeḍḍa n yemsuqqlen i lmend n uṭṭuqqet n yilsawen dilsel çeşitlilik için uluslararası çevirmen ağı

 25/08/2019 Tlaxcala, the international network of translators for linguistic diversity Tlaxcala's Manifesto  
English  
 EDITORIALS & OP-EDS 
EDITORIALS & OP-EDS / Colombia: Tuffɣa n uselway Uribe seg udabu
Date of publication at Tlaxcala: 22/12/2010
Original: Uribe, función de despedida
Translations available: English 

Colombia: Tuffɣa n uselway Uribe seg udabu

Atilio A. Boron اتيليوا. بورون

Translated by  Omar Mouffok عمر موفق

 

 

Álvaro Uribe, aselway n Colombia, d yiwen seg yiqezzaben imeqranen akk n Marikan, yerna ula asmi ay yeffeɣ seg udabu, yessegra-d lekdeb akked terẓeg imi, ɣef leḥsab-nnes, tirebbaɛ timsellḥin n FARC sɛant igriren (camps) deg Venezuela.

Alvaro Uribe deg wurar n "Awal Aneggaru" - D acu-t webrid igerrzen akk ara taɣeḍ ed yeɛdawen-nnek isertiyen ? 1- Ad d-trebḥeḍ ulawen ed leɛqul-nsen. 2- Ad tselleḍ s tuffra i wayen ssawalen. 3- Ad teggalleḍ deg-sen ad ten-tenɣeḍ. 4- Ad ten-tmeḍleḍ deg yiẓekwan ucriken.

 

Ma d Aɣlif (ministère) amarikani n tɣawsiwin n beṛṛa, war aɛdaz, yerna-d deg wawal n umeddakel-nnes, deg temlilit n Tuddsa n Yiwunak Imarikaniyen (Organisation des Etats Américains), imi ula d netta yetthem Venezuela yerna yenna-d Uribe yesɛa ttbut “ibanen” ɣef wanect-a. S waya, ula d Imarikaniyen sbubben-as lbaṭel i uselway n Venezuela, Hugo Chavez, yerna nnan-d aneggaru-a yefka ttesriḥ i trebbaɛ timsellḥin n FARC akken ad gent igriren (camps) aydeg ara sleɣmun (entraîner) azal n 1500 seg yergazen-nsent. Mi terfa Venezuela yerna assaɣen-nnes idiplumatiyen akked Colombia, Philip Crowley, aneṭṭaq n Weɣlif amarikani n tɣawsiwin n beṛṛa ur yessetḥa yerna yenna-d ayen ay tga Venezuela d “ameḥqur”, yerna anabaḍ (lḥukuma) n Venezuela “yerfa deg lbaṭel”, am wakken ay d-yerna: “Lemmer Venezuela ur tetteg ayen yessefken [i wakken ad tefru taluft-a, ɣas d lekdeb], Iwunak Yeddukklen akked tmura niḍen ad as-tt-ṭṭfen d tuḥsift”. Yessefk ad d-nesmekti, seg useggas n 2006, Iwunak Yeddukklen skecmen Venezuela deg wumuɣ (liste) n tmura “ur nebɣi” ad mɛawanent akked Yimarikaniyen deg “yimenɣi mgal rrebrab”. Arturo Valenzuela, amɛawen n Uneɣlaf amarikani n tɣawsiwin n beṛṛa ay d-yelhan s temsal n Uzinmaḍal Utrim (Hémisphère Ouest) yenna-d awal icuban win n Crowley, yerna yenna-d ayen ay d-yekcef Uribe d “taɣawsa tameqrant”. Ayen ay d-nnan sin-a n yemḍebbren imarikaniyen d ayen ay aɣ-yejjan ad newhem amek ay tga lefhama-nsen, yerna ɣas ma yella skiddiben taɛinanit, nettwali-ten ssawḍen ad sseɣlin leqder-nsen swaswa kan am uselway acolombi Álvaro Uribe.

Iban, i wakken ad asen-ɛejben i yemḍebbren-nsen imnukdanen (impérialistes), ad gen akk ayen zemren i wakken ad d-sqenɛen agdud s temsalt-a “taweɛṛant” ay d-yettwakecfen ɣef Venezuela. Yerna, was ccek, ula d Axxam Amellal amarikani yessuter seg uselway n Colombia ad yeg aya i wakken ad d-yessken i tikkelt taneggarut, “ttbut n leḥmala”-nnes i Yimarikaniyen, qbel ma yeffeɣ seg udabu. D acu kan, neẓra daɣen ssrabes imarikaniyen n DEA, CIA akked FBI heyyan-d ikaramen (dossiers) iberkanen ɣef Uribe, d wid ay d-yettakfen ttbut ɣef uttekki-nnes akked trebbaɛ n tehyufin (drogues) n Colombia. Dɣa s waya, Uribe yettwaṭṭef d ameṛhun, yerna s kra n wayen ara as-ssutren Yimarikaniyen ad asen-t-yeg, ma ulac, ad as-teḍru am uselway aqbur n Panama, Manuel A. Noriega, ay yettwaḥebsen, ass-a, deg yiwen seg leḥbas n tɛessast tameqrant deg Yiwunak Yeddukklen. [1]

Tamezwarut, ayen ay d-yenna Uribe yeffeɣ i ṣṣwab, maca argaz-a d akeddab yegguman ad d-yeqqel s abrid. Lekdeb am wa yeɣli-d swaswa kan deg tallit-nni aydeg t-ḥwajen Yimarikaniyen akken ad cewwlen yes-s Chavez, imi tifranin n tselwit n Venezuela ad d-ilint deg wass n 26 Ctembeṛ. Seg tama niḍen, s lekdeb am wa yettɛawan Imarikaniyen akken ad kemmlen tikli-nsen n wezraɛ n yiserdasen-nsen deg Temrikt Talatinit. Yiwen seg yimedyaten (exemples) ay nezmer ad ten-id-nefk ɣef waya netta d astenyi n yiwen n leɛqed gar Obama ed Uribe aydeg Colombia teqbel ad tefk – ma ulac – 7 n yisaduren (bases) iserdasiyen i yiserdasen imarikaniyen deg wakal-nnes. D aya ay yejjan imḍebbren-nni n unabaḍ (lḥukuma) amarikani ad d-inin “ttbut” n Uribe ɣef wayen ay d-yeskaddeb ɣef Venezuela d tamsalt “taweɛṛant”, ɣas akken ẓran d lekdeb amsari ay bɣan ad t-rren d tidet s tugniwin n tkellax. Maca ur yessefk ad nettu: lekdubat d aḥric yesɛan dduṛ ameqran deg tsertit tamarikanit, imi s lekdeb ay zemren Yimarikaniyen ad d-afen tisebbiwin akken ad d-ḥettmen lbaṭel-nsen.

Ayen ay d-yenna Uribe d lekdeb, acku tirebbaɛ n FARC, deg tidet, ṭṭfent 30% seg wakal n Colombia (yerna anabaḍ [lḥukuma] acolombi yeẓra aya), ihi d acu n tmara ara ten-yerren ad skecmen 1500 n yergazen ɣer wakal avenezueli ? D acu n tmara ara yerren imḍebbren-nsen ad ṛuḥen ɣer Venezuela akken ad kken imuras (vacances) yerna ad sɛun 85 n yegriren (camps) deg tmurt tabeṛṛanit fell-asen ? Ɣas ma yella llan aṭas n yisertayen (politiciens) ikeddaben deg Temrikt Talatinit, maca Uribe yezmer ad yili d netta ay d agellid-nsen: d adabu acolombi s timmad-nnes – win ay ḥekment trebbaɛ n yimeṛkantiyen imerka – ay yejjan iḥricen imeqranen seg wakal-nnes (ladɣa tiẓegwa) ad ten-ṭṭfen yemsettiyen n tehyufin (trafiquants de drogue) akked trebbaɛ timsellḥin.

Iɣallen icolombiyen mmɣen ɣef wakal n ugafa n Ecuador (ɣef tlisa n snat-a n tmura), yerna sdeffir tedyant-a, imḍebbren n Ecuador nnan-d talast ay ten-icerken ed Colombia teqqel d tama aydeg yiwen ur yezmir ad yekk neɣ ad yezdeɣ imi ay teccuṛ d tirebbaɛ timsellḥin. Maca Uribe yeqqen taṭṭiwin-nnes ɣef waya yerna ittezzem ɣef ljiran-nnes imi ur gin ayen ay yessefk netta s timmad-nnes ad t-yeg: Colombia ur tezmir ad teḥkem akal-nnes yerna tetthamay tijiratin-nnes d nitenti ay tt-icewwlen. Ma d Iwunak Yeddukklen, rran iman-nsen ur ẓrin tidet, yerna sseqdacen lekdubat-a i wakken ad nebcen anabaḍ (lḥukuma) abolivari n Venezuela imi ay yugi ad yeknu ddaw tecḍaḍt-nsen. Yuɣ lḥal, Imarikaniyen ceḥnen ɣef Venezuela imi ay tt-bɣan ula d nettat ad tettekki deg “yimenɣi mgal tehyufin [drogues]” deg wakud aydeg sseqdacen “tilelli n tɣemsa” akken ad ṣṣren Uribe. Deg tidet, d Colombia ay d tamurt tameqrant akk ay yesnuzuyen takukayint ɣer tmura n beṛṛa (yerna d nettat ay d tamurt tameqrant akk n ussetti n tehyufin deg umaḍal). Tamurt-a iselleḥ-itt Uribe yerna aselway-a, s wemɛawen-nnes aderɣal akked Yimarikaniyen, yerra tamurt-nnes d tahrest (colonie) tamarikanit. Mi ara nwali ɣer rekku-a akk, ad nẓer ziɣ, mi d-nnan Venezuela teffer ɣer-s imsellḥen n FARC d lekdeb ayyes Imarikaniyen bɣan ad kellxen i medden. Lekdeb am wa ur yesɛi llsas yerna amdan imeɛnen ur yezmir ad t-yamen. Lekdeb am wa ikeccef-d kan udem amerku ay yesɛa uselway Uribe.[2]

Tis snat, amek ay nezmer ad nettu lekdubat iciṭaniyen ay d-yeskaddeb Uribe asmi ay ẓedmen yiɣallen-nnes imsellḥen ɣef wakal n Ecuador s uɛawen n yiɣallen imarikaniyen ? Ass-nni, ɣef wakken ay d-yenna Uribe, iɣallen-nnes llan ttḍafaren yiwet n terbaɛt n FARC ay asen-irewlen ɣer Ecuador. D acu kan, wid ay igan tasestant (enquête), ufan-d imsellḥen-nni n FARC ay nɣan Yicolombiyen deg Ecuador mmuten mi llan ṭṭsen – aya yesskanay-d tummɣa-nni tella-d deg yiḍ, yerna kra seg wid-nni yemmuten llan lsan ula d ipijamaten. S waya, ayen yeḍran ass-nni deg Santa Rosa de Sucumbios ur yelli d imenɣi wanag d tanegzart (massacre). Tadyant-a teḍra-d cwiṭ kan sdeffir n 12 n yiḍ, deg wass n 1 Meɣres 2008. Iserdasen Icolombiyen ay yettekkan deg-s ɛawnen-ten yiserdasen imarikaniyen n usadur (base) aserdasi n Manta, deg Ecuador, imi d wid-nni kan ay d iɣallen imsellḥen iwḥiden ay izemren ad wten ixxamen deg tlemmast n teẓgi, deg ḍḍlam n tlemmast n yiḍ.

Amedya niḍen ara d-yesseknen lekdeb n Uribe d tamacahut-nni n uselkim amawi (ordinateur portable) n yemḍebber n FARC Raul Reyes, ay d-ufan yiserdasen icolombiyen deg tedyant-nni. Ɣas ma yella Imarikaniyen wten amkan-nni s tleffuɣin (lbumbat), maca aselkim-nni yeslek, ur t-yuɣ wacemma, aḍebsi-nnes aquran ur yexṣir, yerna “ufan-d” deg-s isalan s wazal-nsen ɣef yinermisen (contacts) ay sɛant trebbaɛ n FARC akked wakk wid ay keṛhen Yiwunak Yeddukkled ed Uribe.[3]

Tis kraḍ, amek ay nezmer ad namen argaz-a mi ara nẓer yefka ttesriḥ i trebbaɛ timsellḥin iqeddcen ɣer yidis n yiserdasen akken ad d-ɣeḍlen rrebrab ɣef tmurt? Deg 16 Fuṛaṛ n useggas-a, tarbaɛt n “Teɣdemt [Justice] ed Talwit” n Lqaḍi Ameqran n Colombia, yessuffeɣ-d yiwen n uṛabul ay d-ikecfen amek 4000 n yemsellḥen ay iqeddcen ɣer yidis n yiserdasen (imsellḥen n Yiɣallen n Uḥuddu n Yiman n Colombia) nɣan 30.470 n medden seg yiseggasen n 1980 arma ay d asmi ay “ttwafesxent” trebbaɛ-a gar 2003 ed 2006. Nnig waya: Lqaḍi Ameqran n Colombia yelqeḍ-d cchadat sɣur yemsellḥen-a ay d-yennan nɣan, s ujemmal, 1085 n medden, ḥettmen 1438 n yigerdan akken ad kecmen deg trebbaɛ-nsen, sɛerqen 2530 n medden, ḥettmen 2326 n medden ad ffɣen seg tnezduɣin-nsen, ḥettmen 1642 n medden akken ad asen-fken idrimen yerna ṭṭfen 1033 n medden d imeṛhan akken ad d-ttwafdun.

Ɣas Uribe yefka afus deg wakk tiɣawsiwin-a tiberkanin, maca imḍebbren-nnes deg Washington mazal ttwalin-t d uẓwir deg yizerfan n wemdan.[4] Yuɣ lḥal, ɣas ma yella Colombia ed Yiwunak Yeddukklen bɣan ad stenyin leɛqed n “Wembaddel Ilelli” gar-asent, maca Congress amarikani yugi ad yestenyi leɛqed-a imi, ɣef leḥsab n weɣmis amagaẓ (conservateur) n “El Tiempo” n Colombia: “iɣallen n laman” akked trebbaɛ timsellḥin ay iqeddcen s idis-nsen nɣan 40 n yemḍebbren n yenmula (syndicates) deg useggas kan n 2009, dɣa d aya ay yerran Colombia d tamurt tamihawt (dangereuse) akk deg umaḍal deg wenrar n leqdic n yenmula. Gar 76-nni n yemḍebbren n yenmula ay yettwenɣan deg umaḍal, 52% seg-sen ttwenɣen deg Colombia. Maca ɣas akka, Iwunak Yeddukklen ttwalin tamurt-a d amedya (exemple) deg yizerfan n wemdan akked yimenɣi mgal rrebrab. Ammas Yeddukklen n Yiqeddacen n Colombia (Central Única de Trabajadores de Colombia) yenna-d deg wayyuren yezrin : “iɣallen n laman” nɣan 2.721 n yimeɣnasen ed yemḍebbren n terbaɛt-a, seg wasmi ay d-tennulfa deg 1986.[5] Ɣas akka, Washington werjin tcikk deg tezdeg n tugdut n Colombia.[6]

Tis kuẓ (ṛebɛa), Uribe, ay “d-ikecfen” lekdeb-a, d netta ay d imḍebber n tmenɣiwin-nni umi semman “ilawen ikellaxen [faux positifs]”. Ɣef wakken d-nnan deg “Crónicon: The Latin American Observer”: deg 3 n yiseggasen-a ineggura, anabaḍ (lḥukuma) n Uribe, yeḍra uxeṣṣar d ameqran. Asmi ay yettwaḥṛes unabaḍ i wakken ad d-yefk ttbut ɣef rrbeḥ n yimenɣi-nnes mgal trebbaɛ timsellḥin ay d-inekren mgal udabu, igen (armée) acolombi yesnulfa-d yiwen n uɣawas (plan): uznen iserdasen ɣer tuddar akked temdinin tigellilin akk deg tmurt, anda ay llan aṭas n medden ur nesɛi aqeddic; sakkin, iserdasen skecmen-d aṭas seg yigellilen-a ifellaḥen ed yilemẓiyen, ɣurren-ten ad asen-fken aqeddic, maca, mi ten-uwyen, nɣan-ten war akukru yerna sselsen-asen iceṭṭiḍen n wid yettekkan deg trebbaɛ timsellḥin. S waya, anabaḍ yefka-d ttbut la ineɣɣ “iɣewwaɣen (rebelles)”, ma d iserdasen-nni ay yettekkan deg tmenɣiwin-a, uɣen idrimen ɣef yal “iɣef” ay nɣan.

Iɣallen n uḥuddu n yiman n Colombia (d wid ay yenɣan igiman [luluf] n medden deg lbaṭel)

Ɣef wakken d-nnan kra, ma ulac, 1700 n medden ay yenɣa uwanak (ddula) acolombi deg tallit aydeg Juan M. Santos (ara d-ixelfen Uribe) yella d Aneɣlaf n Temḥaddit.[7] Taɣawsa niḍen ara aɣ-d-yesseknen “tugdut” n Colombia nettat d aẓekka-nni ucrik ameqran ay d-skeflen deg 16 Fuṛaṛ 2010. Ɣef leḥsab n kra, d wa ay d “aẓekka ucrik ameqran akk ay d-yettuskeflen deg umezruy atrar deg Temrikt; yerna ɣas yessewḥac”, maca iɣmisen imeqranen n Colombia akked umaḍal ffren akk fell-as isalan. “Aẓekka-a, ay d-yezgan deg La Macarena, deg ugezdu [department] n Meta, ufan-d deg-s, ma ulac, 2000 n medden, yerna (ufan-t-id) s leqdic akked ṣṣber n twaculin n wid-nni iɛerqen, s leqdic n yiwet n terbaɛt n yemsenmula [syndicalistes] akked kra n yimazanen [députés] ibriṭaniyen ay d-yusan ɣer Colombia deg Dujembeṛ 2009 akken ad gen tasestant [enquête] ɣef tegnit n yizerfan n wemdan”. Yessefk kan ad d-nɛeyyen tama-a tella tegget deg-s tɛessast n yiserdasen icolombiyen seg 2005, maca ɣas akken, yettwakcef-d deg-s uxeṣṣar anect wa.[8]

Timura n tama-a iḥuza-tent rrebrab n uwanak (ddula) deg yiseggasen n 1970, d acu kan, wid ay yesnegren imezdaɣen n tmura-a, gan daɣen aya ɣef ljal n rrbeḥ. Deg wayen yerzan Colombia, Uribe akked yemsellḥen-nnes yeffuden idammen ɣeḍlen-d rrebrab ɣef yifellaḥen s tmenɣiwt n medden seg rrif akked uḍegger n tleffuɣin (lbumbat) ɣef tmiwa aydeg zedɣen. S waya, ifellaḥen-a ufan-d iman-nsen weḥlen gar, seg tama, iserdasen icolombiyen ufsiden ed trebbaɛ timsellḥin yellan ɣer yidis--nsen, seg tama niḍen, imsellḥen n ussetti n tehyufin (trafic de drogue). Dɣa d aya ay ten-yessawḍen ad rewlen seg tmiwa aydeg zedɣen yerna ad d-jjen imelyunen n yiqeṭṭaren n wakal. Jomary Orteon (n Umazday Acolombi n Yibugaṭuyen) yenna-d deg yiwen n usarag n Useqqamu n Yeɣlanen Yeddukklen (Nations Unies) i Yizerfan Udmisen, Imettiyen ed Yidelsanen ay d-yellan deg Genève deg Mayyu 2010: azal n 4.500.000 n yifellaḥen icolombiyen ay irewlen seg wakal-nsen, yerna ass-a, anabaḍ [lḥukuma] acolombi ad yefk ayla-nsen i wiyaḍ (yuɣ lḥal, d wid-nni swaswa ay ten-yesrewlen deg tmiwa-nsen ara yawyen akal-nsen). S waya, d imeṛkantiyen imawlan n wakal akked yemḍebbren n teṛmisin (tikebbaniyin) n tfellaḥt, wid ay yettakfen idrimen i trebbaɛ timsellḥin ay iqeddcen s idis n yiserdasen, d nitni ara iweṛten akal-a akk. Deg usarag-nni nnan-d ɣas ma yella anabaḍ n Uribe “yesserbeḥ tamurt”, maca mazal yal aseggas 150.000 n Yicolombiyen ay irewwlen seg tmiwa-nsen ɣef ljal n ccwal-a. Aneɣlaf acolombi n wesɣiwes (planification), Esteban Piedrahita Uribe (ay yessawlen s yisem n Colombia deg usarag-nni), ur yenkiṛ aya, wanag yenna-d kan: “awanak [ddula] tekkes 2 n yimelyunen n yiqeṭṭaren n wakal ay yellan gar yifassen n trebbaɛ yeffɣen i lqanun, d akal ay uwyent trebbaɛ-a s lbaṭel, yerna imir-a d ccṛeɛ ara yeẓren anwa ay d imawlan n tidet n wakal-a”.[9] Akken yebɣu yili, ar ass-a mazal yettkemmil umennuɣ gar yidisan yemgerraden ɣef wemḍan (nombre) n yiqeṭṭaren n wakal ay jjan yimawlan-nnes, d acu kan, imḍebbren n tmurt bɣan ad jemɛen akal-nni i yiman-nsen, ad smeɣren yes-s ihri-nsen (ṛaselmal), akken ay d-yenna Marx deg yiɣef wis 24 n wedlis-nnes “Ihri”. Llan wid ay d-yennan awanak iɛawed afraq n 6 n yimelyunen n yiqeṭṭaren n wakal (ay yettwakksen i yimawlan-nnes), ma d wiyaḍ nnan-d 10 n yimelyunen n yiqeṭṭaren. Akken yebɣu yili, anect yebɣu ilin yiqeṭṭaren-a, yessefk kan ad nekkes ccek deg yiwet n tɣawsa: tugdut n Colombia tessaweḍ kan ad tekkes akal i yifellaḥen n tmurt akken ad t-tefk i yemḍebbren imsihriyen (capitalistes) n temguri (industrie) n tfellaḥt.[10]

Ma d Uribe, argaz ay yettekkan deg wakk tiwuɣa-a, ass-a yerfed aḍad-nnes akken ad yetthem Venezuela ed Tegrawla tabolivarit. Iban d Imarikaniyen ay as-yennan aya i wakken ad d-afen tagnit tamaynut aydeg ara nebcen aselway avenezueli, Hugo Chavez. Yuɣ lḥal, Imarikaniyen ttnadin ad d-afen tisebbiwin akken ad kemmlen tikli-nsen n “udabu aquran”, yerna Obama yettban-d teɛjeb-as tikli-a ugar n umeḥqur-nni n Bush ay yellan d aselway uqbel-is. Ɣas ma yella kra n yisellaḍen (analystes) ay iqerben ɣer Wexxam Amellal am Joseph Nye, mazal bɣan ad aɣ-sqenɛen tikli n Obama d tadiplumatit ugar n tin n Bush, neɣ d “tuḥṛict”, maca Washington mazal tebɣa ad teddu s tikli taqurant, tikli usseqdec n wemrig (leslaḥ): d aya ay ten-yejjan ad ledyen isaduren (bases) iserdasiyen deg Colombia; deg tegzirin n Aruba ed Curaçao (ay d-yezgan kra kan n yikilumitren ɣef Venezuela; deg Salvador akked Honduras; d aya ay ten-yejjan ad aznen 7000 n yiserdasen n Marines akked yemrigen yemgerraden ed yimawayen n yisafagen (porte-avions), ikubṭiren, imeddayen (véhicles) itteddun ama deg waman, ama deg wakal akked yisafagen imaynuten ɣer tmurt n Costa Rica ay iqerben ɣer Venezuela. D aya daɣen ay yekkan Imarikaniyen ad ɛawden ad d-bnun Tanawt-nsen (flotte) tis 4. Deg wanect-a akk, anabaḍ (lḥukuma) n Uribe yetturar dduṛ d ameqran s waṭas, imi ay yessifsus i Yimarikaniyen akken ad cewwlen timura ay keṛhen yerna ad asent-sɛerqen ayen bennunt: Uribe ur yessaweḍ ad iḥudd 586-nni n yikilumitren n tlisa yellan gar Colombia ed Ecuador, yerna yessers-asent kan 8 n trebbaɛ n yiserdasen akken ad tent-ɛassen. Ur yezmir ad iḥudd 2216-nni n yikilumitren n tlisa gar Colombia ed Venezuela, yerna tilisa-a qqlent d tawwurt ayseg keccmen neɣ teffɣent trebbaɛ n yemsettiyen n tehyufin (trafiquants de drogue) akked trebbaɛ timsellḥin ay iqeddcen ɣer yidis n yiserdasen. S waya, Uribe iɛerreḍ ad yeg akk ayen yezmer i wakken ad d-yesnulfu taluft ayyes iserdasen imarikaniyen ad d-afen tasebba ad d-gren iman-nsen deg Temrikt n Wenẓul; taswiɛt-a, mazal tejhed cceḥna gar Colombia ed Venezuela, yerna taluft-a d tin ara d-yewṛet Santos asmi ara yeqqel d aselway n Colombia. Dɣa s waya, ur izemmer ad ibeddel tikli-a aydeg Uribe ed Yimarikaniyen bɣan ad idum umennuɣ gar Colombia ed Venezuela. Nnig waya, bɣan daɣen ad as-rwin i Chavez tifranin-nnes ara d-yilin deg Ctembeṛ.

Uribe yeqbel ad as-yeddu deg lebɣi i Washington ula deg ddqiqa taneggarut n udabu-nnes imi ay yugad ɣef uzekka-nnes yerna ur yebɣi ad as-teḍru am Noriega [aselway aqbur n Panama] ay la irekkun, ass-a, deg texxamt-nnes, deg lḥebs amarikani, am wakken ur yebɣi ad ilin wid ara t-icaṛɛen deg Wexxam n Ccṛeɛ Agraɣlan ɣef tmenɣiwin aydeg yettekka. Ɣef ljal n waya, yessefk fell-aɣ ad neg snat n tɣawsiwin yesɛan azal d ameqran: yessefk ad d-nekcef udem n tidet n wergaz-a ay d-yeskiddiben ɣef wiyaḍ yerna yessefk ad nessuter seg terbaɛt n tmura UNASUR ad qedcent s tɣawla akken ad reglent abrid i tikli n ccwal ay tebɣa Washington ad tt-id-tawey deg Temrikt-nneɣ. Tamsalt-a ur yessefk ad d-telhu yes-s Tuddsa n Yiwunak n Temrikt (Organisation des Etats Américains), imi ur tenkiṛ lekdubat ed wenbac n Uribe, wanag d timura n UNASUR ay yessefken ad d-lhunt yes-s. Nessaram tarbaɛt-a tamaynut n tmura n Temrikt n Wenẓul ad teg kra s tɣawla, ma ulac, asmi ara tessiweḍ Washington, s yiṣemṣaren-nnes deg Temrikt Talatinit, ad tebnu llsisan-nnes n ccwal, ass-nni ifut lḥal.

Tinqiḍin:

[1] Ɣrem taftart-a ayɣef tettwakkes lbaḍna n Taṛcibin n Laman Aɣelnaw n Yiwunak Yeddukklen: “U.S. INTELLIGENCE LISTED COLOMBIAN PRESIDENT URIBE AMONG ‘IMPORTANT COLOMBIAN NARCO-TRAFFICKERS’ IN 1991”, at:

http://www.gwu.edu/~nsarchiv/NSAEBB/NSAEBB131/index.htm

[2] Deg talast ɣezzifen 2000 n yikilumitren aydeg ur llint lumiṛat ayyes ara tettwaɛqel (am yisafen, igelmimen neɣ idraren) aṭas n medden (ama d imdanen n menwala, ama d tirebbaɛ n tehyufin [drogues], tirebbaɛ timsellḥin iqeddcen ɣer yidis n yiserdasen, imsettiyen [trafiquants] ed yiniɣiyen [criminels] zemren ad zegren ɣer tmurt tabeṛṛanit yerna ad d-qqlen ɣer tmurt-nsen akken ay asen-yehwa. Maca ddiɛaya-a ay d-yennan Hugo Chavez yeqbel ad ilin yegriren n wesleɣmu (camps d’entraînement) n FARC deg Venezuela d lekdeb ay d-yesskanayen lqella n ussetḥi ed ukukru n Uribe akked yemḍebbren-nnes n Washington.

[3] Ɣrem ttbut ay d-tura Margarita Vallejo akked Horacio López deg « El ataque de Colombia en territorio ecuatoriano: detrás de las palabras y los hechos » (Buenos Aires: Ediciones del Centro Cultural de la Cooperación, 2009)

[4] Ẓrem http://www.telesurtv.net/noticias/secciones/nota/66984-NN/ex-paramilitares-colombianos-reconocen-haber-cometido-cerca-de- -30-mil-500-asesinatos/

[5] Ẓrem http://www.eltiempo.com/colombia/justicia/asesinados-40-sindicalistas-el-ano-pasado-en-colombia-denuncia-organizacion-de-trabajadores_7120268-1

[6] Nnig waya, 27 n yineɣmasen ay yettwenɣen deg uqeddic-nsen deg 8 n yiseggasen-a ineggura ay yeḥkem Uribe. Isalan niḍen bedren-d amḍan (nombre) d ameqran ugar.

[7] Ẓrem „Cronicón „ n Fernando Arellano http://www.cronicon.net/paginas/cronicon_menu.htm

[8] Ẓrem http://www.publico.es/internacional/288773/aparece/colombia/fosa/comun/cadáveres; akked http://www.rebelion.org/noticia.php?id=99507

[9] Rzum ɣef udeg n uẓeḍḍa n tregwa timagaẓin (conservateurs) n Cadena Caracol, 4 Mayyu, 2010: http://www.caracol.com.co/nota.aspx?id=1019108

[10] Ẓrem isefka n MOVICE, "Movimiento Nacional de Víctimas de Crímenes de Estado: 4.5 million displaced peasants as of 2009":

http://www.movimientodevictimas.org/index.php?option=com_content&task=view&id=278&Itemid=64Expropriated agricultural surface, 2009:

http://www.movimientodevictimas.org/index.php?option=com_content&task=view&id=274&Itemid=69





Courtesy of Atilio Boron
Source: http://www.atilioboron.com/2010/07/como-negarse-ante-un-pedido-del-imperio.html#more
Publication date of original article: 25/07/2010
URL of this page : http://www.tlaxcala-int.org/article.asp?reference=3089

 

Tags: ColombiaUribeVenezuelaFARCBoliviaHugo ChavezEcuadorTirebbaɛ n tehyufinTrebbaɛ n tehyufinTamafya n tehyufinTmafya n tehyufinIwunak YeddukklenYiwunak YeddukklenIgen amarikaniYigen amarikaniAmgaru n tehyufinWemgaru n tehyufinIgen acolombiYigen acolombiIɣallen icolombiyenYiɣallen icolombiyenTagrawla TabolivaritTegrawla TabolivaritTirebbaɛ timsellḥinTrebbaɛ timsellḥin
 

 
Print this page
Print this page
Send this page
Send this page


 All Tlaxcala pages are protected under Copyleft.